كندة علوش: بعد مسلسل "إخواتي" حاتم صلاح مش بس "كوميديان".. ده ممثل ثقيل وحقيقي - الهلال الإخباري

علّقت الفنانة كندة علوش على "الدويتو" الذي جمعها بالفنان حاتم صلاح في مسلسل إخواتي، والذي نال إعجاب الجمهور، مؤكدة أن التجربة كانت مفاجأة حتى لها شخصيًا.

وقالت خلال لقائها مع الإعلامية لميس الحديدي في برنامج كلمة أخيرة على قناة ON: "قبل مسلسل (إخواتي)، كان حاتم صلاح بالنسبة لي، ولناس كتير، معروف كممثل كوميدي بس. لكن بعد شغلنا مع بعض، اكتشفت إنه مش بس كوميديان، ده ممثل تقيل جدًا."

وأضافت: "في المشاهد الدافئة، حاتم حساس جدًا.. عنده مشاعر حقيقية مش مصطنعة. حتى في الكوميديا، هو مش بس بيضحكك، هو بيلعب على الكومديا بوجه عام وكوميديا الموقف "

وتابعت: "كنت حريصة إن الناس تحب (الثنائية) بينّا، وكمان المخرج كان حريص على ده، رغم إن الشكل العام للكابل كان غريب: هي كوافيرة، وهو حانوتي، وبيبيع جثث! لكن كان فيه حالة طريفة بينهم، زي (الناقر ونقير)، والناس حبّوا ده جدًا."

وعن ردود فعل الجمهور، قالت:"في الحلقات الأخيرة، لقيت الناس بتعمل كليبات لينا من مشاهد المسلسل، وبيشاركوها على السوشيال ميديا. ماكنتش متوقعة الحب ده، بس بسطت جدًا إن الناس تعايشوا مع (الكابل) ده."

أما عن أول مشهد جمعهما، فكشفت كندة: "أول مشهد صورناه مع بعض كان مشهد ضرب، وأنا كنت متحمسة جدًا، وفعلًا ضربته بجد وسببّت له شوية آثار جانبية مش لطيفة!"

وأضافت ضاحكة: "كنت شايفة إن ناهد، في لحظة الغضب، مش هتعبر عن ده بكلام.. كانت لازم تضرب!"